رحمتليک اماني و عبدالله عباسی یه

مهندس سعید نعیمی

آلتي ايل اونجه ، عليرضا ايله بيرگه ، فعاللاريميزين معروض قالديغي سيخينتي لاري دوشونوب ، بو سس سيزليک و سانسورو پوزماق ايچين يول آختاريرديق ، باشقا يولداشلار ايله ده بو حاقدا دانيشديق و سونوندا ائله آذر آيينين بو گونلرينده ، تربيت مدرس دانيشگاهيندا " آسمک " ي قورماق ايچين سوزله شديک ، بيز بئش کيشي ايديک : عليرضا ، ايلقار ، رضا ، حسن و من.

بئله ليکله منده اولدوم خبرچي ، آجي خبرلري يايماقدا کدر دويدوق و شيرين ، سئوينديريجي خبرلره ایسه موشتولوق آلديق.

او گونلردن بئينيمده ، اونودولمايان خاطيره لر قاليب ، بو گونلرين موناسيبتینه نئچه سيني سيزايله پايلاشماق ايسته ييره م .

 الف ) رحمتليک اماني زيندايدي ، اولدوقجا يازيلاردا ، بياناتلاردا و چيخيش لاردا آديني گتيريب و آسمک اولاراق تئز و شرط سيز آزاد اولماسيني ايسته ییرديک و سونوندا چوخ سئوينج ايله آزادليق خبريني بئله يايديق :

حورمتلي سويداشلار،

عزيز آذربايجان ميللتي ،

 آزادليق سئون اينسانلار!

ميللتيميزين مقاويمت سيمبولو ، مهندس غلامرضا اماني ، دورد ايل شوونيزم و استبداد قارشي سيندا ، سارسيلمادان مبارزه آپاراندان سونرا ، سه شنبه گونو مهر آيينين 29 دا آزادليغا بوراخيلميشدير.

آسمک اولاراق جناب اماني نين آزادليغيني اوزونه ، عاييله سينه ، آذربايجان ميللتينه و بوتون آزادليق سئون اينسانلارا تبريک دئيييريک ، يقين کي اماني نين آدي ، ميللتيميزين آزادليق اوغروندا آپارديغي مبارزه ده پارلاق اولدوز کيمي ايشيق ساچاجاق.

 بوگون ایسه اماني لرين کدرلي اولوموندن 40 گون کئچير، بو ايتگيني دوشونورکن " کئشکه آزاد اولماسايدي " ، خياليمدا آخيب و ايتير.

 

ب ) 20 شهريور 1387 : ايفطار قوناقليغينا گئج چاتديق ، قاپييا آز قالان ، ماشينلاري و بللي قيافه لري گورجک ، دورومون نئجه اولدوغونو سئزديم و حيات يولداشيم سعيده نين اليندن چکيب اوزاقلاشارکن " دیييه سن هله سيرا بيزه گلمه ييب " دئديم.

هله ده گوردويومه اينانا بيلميرديم ، بير قارانليق کوچه ده دايانيب و يولداشلارين اسير اولماسينا باخيرديم ، آخي بو چيلپاق قانون سوزلوق قارشيسيندا اليمدن نه گله بيلردی ؟  اوجادان قيشقيرماق ايسته سه مده ، آغزيم آچيلميردي ، او لحظه لرين آغيرليق و آجيليغيني ، کايانين " ياشاماق ايچين اولوم سيراسي " آدلي ماهنيسي يوخ ائتدي ، بير آز خيابانلاردا دولانيب و نئچه دونه همن ماهني ني دينله ديک سونرا بير دوستون ائوينه گئتديک ، دایانا بیلمیردیم ، بيرده دوندوک قوناقلیق یئرینه ، سس سيزليک کوچه ده حوکم سوروردو و قاپيدا بير نفر بو سس سيزليگه قوروقچو دايانميشدي.

یوخوم گلمه دی ساعات 5.5 دا موبايلين زنگي  " خبري عاييله لره نئجه وئره جه يم فيکرينه" سون قويدو . حسن رحيمي نين آناسي ايدي .

حسن دونن گئجه دن گئديب ، تئلفونودا سونوکدو ... داي اومودوم کسيلدي گئجه نين بو واقتيندا سني اوياتديم ، سنين خبرين يوخ ؟ سوروشدو.

بير آز سوکوتدان سونرا ، حتما بير يئرده قوناق قاليب ، ناراحات اولمايين هئچ خبر يوخدو ، یازیق آنانی دینج اولماغا چاغیردیم.

ايکي ساعات سونرا بعضي ندنلره گوره اوزوم زنگ ائله یيب و سسيم تيتره يه - تيتره يه ، حسنين توتولماسيني باجي سينا دئديم ، آز سونرا جناب راشدي نين اوغلو ياشار زنگ ائله دي و همن چتين آن لاری بيرده ياشاديم ... .

 

ج ) گوزوم بئله اولايلاري آز گورسه ده قولاقلاريمين آمما بو توتوقلانمالاردان بول – بول تجروبه سي وار.

 26 مرداد 1386:  " آبي " سسله دييم عبدالله عباسي ايله ، مرندده ايکي عزيز يولداشين تويونا قاتيليب  و شنلي گون کئچيرديک. قاييداندا " آبي" نين دوستاق يولداشي اولان حسين ده بيزه قوشولدو ، آراز قيراغيندا قاراباغی و صمد عمی نی یاد ائله ییب ، دولانا – دولانا دوندوک .

 سعيد ، رضا ، جليل ، بهروز و ليلا دوستاقدايديلار ، زنگاندا يول اوسته عطيه خانيما باش ووروب گلدیک کرجده آيريلديق.

28 مرداد 1386 - گئجه ياريسي مينا خانيم زنگ ائله دي و صالح بيين توتوقلانماسین دئدی ...صوبح ساعات 8.5 دا ایسه عبدالله زنگ ائله دي ، تئلفونو گوتورجک سس کسيلدي و سونرادا " The mobile set is off " ، عبدالله دا توتوقلانميشدي.

23 آبان 1387 : ساعات 10دا نئچه SMS گلدي ، قانون درسليگی ایدي !!

 " هشدار : حضور شما در تجمع غير قانوني بر اساس مواد 618 و 500 و610 قانون حداکثر دو سال حبس به همراه دارد . ..... ".

نئچه يولداش ايله ، گون اورتا قوما ساري يولا دوشدوک ، منتظري و صانعي جنابلاري ايله گوروشمه ميزي ، اون گون قاباقدان پلانلاميشديق* .

يول اورتاسيندا ساعات 4 ده  آبي زنگ ائله دي ، تئلفونو گوتورجک سس کسيلدي و سونرادا " The mobile set is off " عبدالله  بيرداها توتوقلانميشدي.

ایندی بو سورغويا جاواب وئرمه لي یيک : ياشاماق ايچين زيندان سيراسيندان باشقا يولوموز وارمی؟

 

 * زاماني گلديکده بو گوروشون خاطيره سيني يازاجاغام.

http://dogruyol.blogfa.com/post-122.aspx